Batur sasak demen belekakaq. Lelakaq niki pade dait pantun alem base Indonesia. Lelakaq bau tekadu jari hiburan leq tatkalete si poro-poro tokol kance batur leq berugaq elen atawe leq bebaleq bangket.
Lelakaq loeq macemne, araq lelakaq nasehat, araq lelakaq bajang, araq lelakaq kanak2, araq lelakaq beboyean dll. Silaqde pade bace lelakaq si arak leq bawaq niki:
LELAKAQ NASEHAT
Mun belaying leq tembere
Kapek paoq siq tetolang
Mun sembahyang endekte mele
Sanget laloq siqte jogang
Kelaq manis daun kentujur
Manggis kataq araq sepempang
Epen tangis leq dalem kubur
Tangis awak saq endek uah sembahyang
Ampet2 kadu kipas daun kesambiq
Saq tebau leq taman sedin lendang
Apik2 gamaq entan pade jagaq diriq
Sengaq mngkin jamane saq uah jogang
Endaq girang lepas sampi ngaro
Leq sedin pelepe loeq laloq uletne
Endaq gamaq girang lepas uni bawo
Mun bakat ate sekat laloq oatene
Mun bebante sembalun bumbung
Dasan telage langante jok rinjani
Lamun mate ndeq teburung
Ngumbe care adek te bakti
LELAKAQ ANAK-ANAK
Bau paku leq sedin oloh
Jari kandoq mangan tengari
Pacu-pacu pade sekolah
Jari sangote lemaq mudi
Impan bembek siq daun waru
Pelembah polaq leq dese Pujut
Leman kodeq te pade pacu
Uahte toaq jari penurut
Sei rengge jeruk manis
Jeruk manis leq atas langan
Sai wede kanak nangis
Kanak nangis mele mangan
Jelo senen te juan buaq
Jelo ahad te juan apuh
Lamunte genem ajaq juaq
Lamunte sagaq deq araq angkuh
Pempang ere tekadu kaliq longkak
Batang mitaq te piaq jari pemanju
Moge-moge araq gamaq kesukaq
Kanak sasak niki sayan pacu
LELKAQ BEBAJANGAN
Kayuq timus ariq jari warangke
Kayuq mamben ariq jari pengkaliq
Sangkak ngemus ariq tegitaq beraye
Mule angen ariq mele merariq
Buaq asem ariq begerintang
Kayuq aden begeririk
Jelo malem begerinsang
Selung angen deq baun piriq
Talet bunge ariq leq bawaq bila
Taliq paku ariq siq penyalin
Munne mene ariq siq idap rase
Sarian aku bae ariq siq tekawin
LELAKAQ BEBONYEAN
Mun belauq sik ku bedaye
Talet gadung dendeq-dendeq
Munku mauq si pade waye
Tanggep gadrung gorok bembek
Lalo meken leq jarian
Bau tanaq impan jangkrik
Leteng laloq idap tian
Melet boye jengger ngencik
Lolon renggak jari tali
Lolon belimbing sedin langan
Lamun erak sejari jari
Pokok ngibing jangke bian
LELAKAQ AGAMA
Bubut kerete dese lenek
Anak gagak kembang sandat
Idup mate urusan nenek
Endak lupak bace syahadat
Luek Guntur leq gumi daye
Ujan ndeq araq, angin doing rere
Lueq batur lupak agame lantaran keselaq siq lengon dunie
Suran bian sugul eleq jebak
Demen kelemaq tulak jok barene
Pengajian bilang lembuq lembaq
Laguk dek tesimak dek arak gunene
0 komentar:
Posting Komentar